ಅಸಹಾಯಕಿ ವೃದ್ಧೆಗೆ ಆಸರೆಯಾದ ‘ಅಕ್ಕಪಡೆ’: ಸಾಂತ್ವನ ಹೇಳಿ ವೃದ್ಧಾಶ್ರಮಕ್ಕೆ ಸೇರಿಸಿದ ಮಹಿಳಾ ಪೊಲೀಸರು
ಚಿಕ್ಕಮಗಳೂರು: ಕಷ್ಟದಲ್ಲಿದ್ದ ಅಸಹಾಯಕಿ ವೃದ್ಧೆಯೊಬ್ಬರಿಗೆ ತಕ್ಷಣವೇ ಸ್ಪಂದಿಸಿ, ಆಶ್ರಯ ಕಲ್ಪಿಸುವ ಮೂಲಕ ಚಿಕ್ಕಮಗಳೂರು ನಗರದ ‘ಅಕ್ಕಪಡೆ’ (ಮಹಿಳಾ ಪೊಲೀಸ್ ಸಿಬ್ಬಂದಿ ತಂಡ) ತನ್ನ ಮಾನವೀಯ ಮುಖವನ್ನು ಎತ್ತಿಹಿಡಿದಿದೆ.
ನಗರದ ರಾಂಪುರ ದೇವಸ್ಥಾನದ ಬಳಿ ವೃದ್ಧೆಯೊಬ್ಬರು ಸುದೀರ್ಘ ಸಮಯದಿಂದ ಏಕಾಂಗಿಯಾಗಿ, ಅಸಹಾಯಕರಾಗಿ ಕುಳಿತಿರುವುದನ್ನು ಗಮನಿಸಿದ ಸಾರ್ವಜನಿಕರು ಪೊಲೀಸ್ ಇಲಾಖೆಗೆ ಮಾಹಿತಿ ನೀಡಿದ್ದರು. ಸಾರ್ವಜನಿಕರಿಂದ ಕರೆ ಬಂದ ತಕ್ಷಣವೇ ಕಾರ್ಯಪ್ರವೃತ್ತರಾದ ‘ಅಕ್ಕಪಡೆ’ ಸಿಬ್ಬಂದಿ ತಕ್ಷಣವೇ ಸ್ಥಳಕ್ಕೆ ಭೇಟಿ ನೀಡಿದರು.
ಸ್ಥಳದಲ್ಲಿದ್ದ ವೃದ್ಧೆಯ ಬಳಿ ತೆರಳಿ ಆತ್ಮೀಯವಾಗಿ ಮಾತನಾಡಿಸಿದ ಮಹಿಳಾ ಪೊಲೀಸರು, ಅವರ ವಿವರಗಳನ್ನು ಪಡೆದುಕೊಂಡು ಧೈರ್ಯ ತುಂಬಿದರು. ಬಳಿಕ ಅವರನ್ನು ಸುರಕ್ಷಿತವಾಗಿ ನಗರದ ‘ಅನ್ನಪೂರ್ಣ ವೃದ್ಧಾಶ್ರಮ’ಕ್ಕೆ ಕರೆದೊಯ್ದು, ಸೂಕ್ತ ಆಶ್ರಯದ ವ್ಯವಸ್ಥೆ ಮಾಡಿಕೊಟ್ಟಿದ್ದಾರೆ.
ಸಮಯೋಚಿತವಾಗಿ ಸ್ಪಂದಿಸಿ, ನಿರಾಶ್ರಿತ ವೃದ್ಧೆಗೆ ನೆರವಾದ ‘ಅಕ್ಕಪಡೆ’ಯ ಈ ಕಾರ್ಯಕ್ಕೆ ಚಿಕ್ಕಮಗಳೂರು ನಗರದ ಸಾರ್ವಜನಿಕ ವಲಯದಲ್ಲಿ ವ್ಯಾಪಕ ಮೆಚ್ಚುಗೆ ಹಾಗೂ ಶ್ಲಾಘನೆ ವ್ಯಕ್ತವಾಗಿದೆ.
