ಬೆಂಗಳೂರಿನಲ್ಲಿ ಭಾರತದ ಮೊದಲ ಕ್ವಾಂಟಮ್ ಫೌಂಡ್ರಿ ಉದ್ಘಾಟನೆ: ಆಸಿಯಾದಲ್ಲೇ ಅತಿ ದೊಡ್ಡ ಸೌಲಭ್ಯ!

ಬೆಂಗಳೂರು: ತಂತ್ರಜ್ಞಾನ ನಗರಿ ಬೆಂಗಳೂರಿನಲ್ಲಿ QpiAI ಸಂಸ್ಥೆಯು ಭಾರತದ ಪ್ರಥಮ ಹಾಗೂ ಏಷ್ಯಾದಲ್ಲೇ ಅತಿ ದೊಡ್ಡ ಕ್ವಾಂಟಮ್ ಫೌಂಡ್ರಿಯನ್ನು (Quantum Foundry) ಉದ್ಘಾಟಿಸಿದ್ದು, ದೇಶದ ಕ್ವಾಂಟಮ್ ತಂತ್ರಜ್ಞಾನ ಕ್ಷೇತ್ರದಲ್ಲಿ ಹೊಸ ಇತಿಹಾಸ ಬರೆದಿದೆ.

ಬೆಂಗಳೂರಿನಲ್ಲಿ ಪ್ರಧಾನ ಕಚೇರಿ ಹೊಂದಿರುವ ಪೂರ್ಣಪ್ರಮಾಣದ ಸ್ಟ್ಯಾಕ್ ಕ್ವಾಂಟಮ್-ಎಐ ಸಂಸ್ಥೆಯಾದ QpiAI ಸ್ಥಾಪಿಸಿರುವ ಈ ಫೌಂಡ್ರಿಯು, 70,000 ಚದರ ಅಡಿ ವಿಸ್ತೀರ್ಣದ ಅತ್ಯಾಧುನಿಕ ಸಂಶೋಧನೆ ಮತ್ತು ಅಭಿವೃದ್ಧಿ (R&D) ಕೇಂದ್ರದ ಭಾಗವಾಗಿದೆ. ಕ್ವಾಂಟಮ್ ಪ್ರೊಸೆಸಿಂಗ್ ಯೂನಿಟ್‌ (QPU) ಉತ್ಪಾದನೆ, ಪರೀಕ್ಷೆ ಹಾಗೂ ಕ್ವಾಂಟಮ್ ಪರಿಹಾರಗಳ ಅಭಿವೃದ್ಧಿ ಕಾರ್ಯಗಳು ಈಗ ಒಂದೇ ಸೂರಿನಡಿ ಲಭ್ಯವಾಗಲಿವೆ.

ಕಾರ್ಯಾಗಾರದ ಪ್ರಮುಖ ಸಾಮರ್ಥ್ಯಗಳು:

* ತಯಾರಿಕೆ ಮತ್ತು ತಂತ್ರಜ್ಞಾನ: ಈ ಸೌಲಭ್ಯದಲ್ಲಿ ಕ್ವಾಂಟಮ್ ಕಂಪ್ಯೂಟರ್‌ಗಳಿಗಾಗಿ ಸೂಪರ್‌ ಕಂಡಕ್ಟಿಂಗ್ ಕ್ಯೂಬಿಟ್‌ಗಳು, ಪೆರಿಫೆರಲ್ ಚಿಪ್‌ಗಳು ಹಾಗೂ ಸಂವೇದಕಗಳನ್ನು (Sensors) ತಯಾರಿಸಲಾಗುತ್ತದೆ.

* ವಿಶೇಷ ಸಾಮರ್ಥ್ಯ: 128 ಕ್ಯೂಬಿಟ್‌ಗಳವರೆಗೆ ಫ್ಲಿಪ್-ಚಿಪ್ ಆಧಾರಿತ ಸೂಪರ್‌ಕಂಡಕ್ಟಿಂಗ್ ಕ್ಯೂಬಿಟ್‌ಗಳನ್ನು ತಯಾರಿಸುವ ಸಾಮರ್ಥ್ಯ ಹೊಂದಿದ್ದು, ಮುಂದಿನ ದಿನಗಳಲ್ಲಿ ಒಂದೇ QPUದಲ್ಲಿ 10,000 ಫಿಸಿಕಲ್ ಕ್ಯೂಬಿಟ್‌ಗಳವರೆಗೆ ಅಭಿವೃದ್ಧಿಪಡಿಸುವ ಬೃಹತ್ ಗುರಿ ಹೊಂದಿದೆ.

ಇಂತಹ ಅತ್ಯಾಧುನಿಕ ತಂತ್ರಜ್ಞಾನಗಳನ್ನು ನೈಜ-ಜಗತ್ತಿನ ದೈನಂದಿನ ಬಳಕೆಯ ಅಪ್ಲಿಕೇಷನ್‌ಗಳನ್ನಾಗಿ ಪರಿವರ್ತಿಸುವುದು ಮತ್ತು ವಾಣಿಜ್ಯೀಕರಣವನ್ನು ಬಲಪಡಿಸುವುದು ಸರ್ಕಾರದ ಮುಂದಿನ ಗುರಿಯಾಗಿದೆ. ಭಾರತದ ಕ್ವಾಂಟಮ್ ತಂತ್ರಜ್ಞಾನ ಪಯಣದಲ್ಲಿ ಮುಂಚೂಣಿಯಲ್ಲಿರುವ ಬೆಂಗಳೂರಿನ ಸ್ಥಾನವನ್ನು ಮತ್ತಷ್ಟು ಬಲಪಡಿಸಲು ಸರ್ಕಾರವು ಉದ್ಯಮಗಳು ಮತ್ತು ತಂತ್ರಜ್ಞಾನ ಸಂಸ್ಥೆಗಳೊಂದಿಗೆ ನಿರಂತರವಾಗಿ ಶ್ರಮಿಸಲಿದೆ.