ಗೇ ಜೊತೆ ಡೇಟಿಂಗ್, ಹನಿಟ್ರ್ಯಾಪ್ ಜಾಲ: ಜಿಗಣಿ ಪೊಲೀಸರ ದಾಳಿ, ಆರು ಮಂದಿ ಖದೀಮರು ಬಂಧನ!
ಆನೇಕಲ್/ಬೆಂಗಳೂರು (ಆಗಸ್ಟ್ 02): ಸಲಿಂಗ ಸಂಬಂಧದ (Gay Relationship) ಆಮಿಷವೊಡ್ಡಿ ಆನ್ಲೈನ್ ಡೇಟಿಂಗ್ ಆ್ಯಪ್ಗಳ ಮೂಲಕ ಯುವಕರನ್ನು ಬಲೆಗೆ ಬೀಳಿಸಿ, ನಿರ್ಜನ ಪ್ರದೇಶಕ್ಕೆ ಕರೆಸಿಕೊಂಡು ದರೋಡೆ ಮಾಡುತ್ತಿದ್ದ ಖತರ್ನಾಕ್ ಜಾಲವನ್ನು ಜಿಗಣಿ ಪೊಲೀಸರು ಭೇದಿಸಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ನಾಲ್ವರು ಪ್ರಮುಖ ಆರೋಪಿಗಳು ಸೇರಿದಂತೆ ಒಟ್ಟು ಆರು ಮಂದಿಯನ್ನು ಬಂಧಿಸಲಾಗಿದೆ.
ಹನಿಟ್ರ್ಯಾಪ್ ಕಾರ್ಯಾಚರಣೆ ನಡೆದಿದ್ದು ಹೇಗೆ?:
ನಕಲಿ ಪ್ರೊಫೈಲ್ ಸೃಷ್ಟಿ: ಆರೋಪಿಗಳ ಗ್ಯಾಂಗ್ ಗೇ ಡೇಟಿಂಗ್ ಆ್ಯಪ್ಗಳಲ್ಲಿ (Gay Dating Apps) ನಕಲಿ ಖಾತೆಗಳನ್ನು ಸೃಷ್ಟಿಸಿ, ಯುವಕರನ್ನು ಸಂಪರ್ಕಿಸಿ ಕೆಲವು ದಿನಗಳ ಕಾಲ ಆತ್ಮೀಯವಾಗಿ ಮಾತನಾಡುತ್ತಿತ್ತು.
ವಿಶ್ವಾಸ ಗಳಿಸಿ ದರೋಡೆ: ಸಂತ್ರಸ್ತರ ವಿಶ್ವಾಸ ಗಳಿಸಿದ ಬಳಿಕ, ಸಲಿಂಗ ಸಂಬಂಧದ ಆಮಿಷವೊಡ್ಡಿ ಆನೇಕಲ್ ಸುತ್ತಮುತ್ತಲಿನ ನಿರ್ಜನ ಪ್ರದೇಶಗಳಿಗೆ ಕರೆಸಿಕೊಳ್ಳುತ್ತಿದ್ದರು.
ಹಲ್ಲೆ ಹಾಗೂ ಸುಲಿಗೆ: ಯುವಕರು ಸ್ಥಳಕ್ಕೆ ತಲುಪುತ್ತಿದ್ದಂತೆ ಕಾಯುತ್ತಿದ್ದ ಖದೀಮರ ತಂಡ, ಅವರ ಮೇಲೆ ಹಲ್ಲೆ ನಡೆಸಿ, ಬೆದರಿಸಿ, ಬೆತ್ತಲೆಗೊಳಿಸಿ ಅವರ ಬಳಿಯಿದ್ದ ಹಣ ಹಾಗೂ ಚಿನ್ನಾಭರಣಗಳನ್ನು ದೋಚಿ ಪರಾರಿಯಾಗುತ್ತಿತ್ತು.
ಸಂತ್ರಸ್ತರು ಸಮಾಜದ ಮುಜುಗರ ಹಾಗೂ ಹೆದರಿಕೆಯಿಂದ ದೂರು ನೀಡದೇ ಇರುವುದನ್ನೇ ಈ ಖದೀಮರು ಬಂಡವಾಳ ಮಾಡಿಕೊಂಡಿದ್ದರು.
ದೂರು ದಾಖಲು ಹಾಗೂ ಆರೋಪಿಗಳ ಬಂಧನ:
ಇತ್ತೀಚೆಗೆ ಈ ರೀತಿ ಮೋಸಹೋಗಿ ಹಣ ಮತ್ತು ಒಡವೆ ಕಳೆದುಕೊಂಡ ಯುವಕನೊಬ್ಬ ಧೈರ್ಯ ಮಾಡಿ ಜಿಗಣಿ ಪೊಲೀಸ್ ಠಾಣೆಗೆ ದೂರು ನೀಡಿದ್ದ. ದೂರು ದಾಖಲಿಸಿಕೊಂಡ ಪೊಲೀಸರು ಕ್ಷಿಪ್ರ ಕಾರ್ಯಾಚರಣೆ ನಡೆಸಿ ಆರು ಮಂದಿಯನ್ನು ಬಂಧಿಸಿದ್ದಾರೆ.
ಬಂಧಿತ ಆರೋಪಿಗಳು:
ವಿಶಾಲ್ (18) – ಆನೇಕಲ್ ಪಟ್ಟಣ
ಅಜಯ್ (19) – ಆನೇಕಲ್ ಪಟ್ಟಣ
ಸೂರ್ಯ (19) – ಆನೇಕಲ್ ಪಟ್ಟಣ
ಸಂಜಯ್ (22) – ಆನೇಕಲ್ ಪಟ್ಟಣ
ಇವರೊಂದಿಗೆ ಕೃತ್ಯದಲ್ಲಿ ಭಾಗಿಯಾಗಿದ್ದ ಇಬ್ಬರು ಅಪ್ರಾಪ್ತರನ್ನು ವಶಕ್ಕೆ ಪಡೆದು ಬಾಲ ನ್ಯಾಯ ಮಂಡಳಿಗೆ (JJB) ಹಾಜರುಪಡಿಸಲಾಗಿದೆ.
ಆನ್ಲೈನ್ ಡೇಟಿಂಗ್ ಆ್ಯಪ್ಗಳನ್ನು ಬಳಸುವಾಗ ಸಾರ್ವಜನಿಕರು ಹಾಗೂ ಯುವಜನತೆ ತೀವ್ರ ಎಚ್ಚರಿಕೆಯಿಂದ ಇರಬೇಕು. ಅಪರಿಚಿತ ವ್ಯಕ್ತಿಗಳು ಅಥವಾ ನಕಲಿ ಪ್ರೊಫೈಲ್ಗಳನ್ನು ನಂಬಿ ನಿರ್ಜನ ಪ್ರದೇಶಗಳಿಗೆ ತೆರಳಬಾರದು. ಇಂತಹ ವಂಚನೆ ಅಥವಾ ಹನಿಟ್ರ್ಯಾಪ್ಗೆ ಒಳಗಾದರೆ ಮುಜುಗರಪಡದೆ ತಕ್ಷಣವೇ ಪೊಲೀಸ್ ಠಾಣೆಗೆ ದೂರು ನೀಡುವಂತೆ ಜಿಗಣಿ ಪೊಲೀಸರು ಮನವಿ ಮಾಡಿದ್ದಾರೆ.
