ಕೂಡ್ಲೂರು ಹಾರವಲ್ಲಿ-ಶೂರವಲ್ಲಿ ಕೋಟೆ ಧ್ವಂಸ: ಚಾರಿತ್ರಿಕ ಅಸ್ತಿತ್ವಕ್ಕೆ ಮುಸುಕಿದ ಗ್ರಹಣ!

ಹನೂರು: ಚಾಮರಾಜನಗರ ಜಿಲ್ಲೆಯ ಹನೂರು ತಾಲೂಕಿನ ಕೂಡ್ಲೂರು ಗ್ರಾಮ ಪಂಚಾಯಿತಿ ವ್ಯಾಪ್ತಿಯಲ್ಲಿರುವ ಸುಮಾರು ಎರಡು ಎಕರೆ ವಿಸ್ತೀರ್ಣದ ಐತಿಹಾಸಿಕ ‘ಹಾರವಳ್ಳಿ-ಶೂರವಲ್ಲಿ’ ಕೋಟೆ ಸೂಕ್ತ ರಕ್ಷಣೆ ಇಲ್ಲದೆ ಸಂಪೂರ್ಣ ವಿನಾಶದ ಅಂಚಿಗೆ ಬಂದು ತಲುಪಿದೆ.

​ಐತಿಹಾಸಿಕ ಹಾಗೂ ಜನಪದ ಮಹತ್ವ:

ಜನಪದ ಐತಿಹ್ಯಗಳು ಹಾಗೂ ತಮಿಳು-ಕರ್ನಾಟಕ ಗಡಿಭಾಗದ ಕಾವ್ಯಗಳ ಪ್ರಕಾರ, ಮಹಾಭಾರತದ ಕಾಲಾನಂತರದ ತಾಂತ್ರಿಕ ವಿದ್ಯೆ ಪ್ರವೀಣರಾಗಿದ್ದ ‘ಆರವಳ್ಳಿ-ಶೂರವಲ್ಲಿ’ ಅಥವಾ ಈ ಭಾಗದ ಶೌರ್ಯ ಮೆರೆದ ವೀರ ಮಹಿಳೆಯರ ಹೆಸರಿನಲ್ಲಿ ಈ ಪ್ರದೇಶಕ್ಕೆ ಈ ಹೆಸರು ಬಂದಿದೆ ಎಂಬ ಪ್ರತೀತಿಯಿದೆ.

​ವಿಜಯನಗರ ಸಾಮ್ರಾಜ್ಯದ ಪತನದ ನಂತರ ಉಮ್ಮತ್ತೂರು ಹಾಗೂ ಹಡಿನಾಡು ಪಾಳೇಗಾರರ ಪ್ರಮುಖ ಗಡಿ ನೆಲೆಯಾಗಿದ್ದ ಈ ಕೋಟೆ, ತರುವಾಯ ಹೈದರಾಲಿ ಮತ್ತು ಟಿಪ್ಪು ಸುಲ್ತಾನ್ ಆಡಳಿತದಲ್ಲಿ ಸತ್ಯಮಂಗಲ ಮಾರ್ಗದ ರಹಸ್ಯ ಸೈನಿಕ ತರಬೇತಿ ಕೇಂದ್ರ ಹಾಗೂ ಶಸ್ತ್ರಾಸ್ತ್ರ ಸಂಗ್ರಹಾಗಾರವಾಗಿ ಕಾರ್ಯಾಚರಿಸುತ್ತಿತ್ತು.

​ಕತ್ತಲಕೋಣೆಯ ಭಯಾನಕ ಕಥೆಗಳು:

18ನೇ ಶತಮಾನದ ಬ್ರಿಟಿಷ್ ದಂಡಯಾತ್ರೆಯ ವೇಳೆ ಅಪಾರ ಚಿನ್ನಾಭರಣ ಹಾಗೂ ಶಸ್ತ್ರಾಸ್ತ್ರಗಳನ್ನು ರಕ್ಷಿಸಲು ಕೋಟೆಯ ಕೆಳಗಿನ ಗುಪ್ತ ಸುರಂಗದಲ್ಲಿ ಬಚ್ಚಿಟ್ಟು, ನಿಷ್ಠಾವಂತ ಶೂರ ಸೈನಿಕರನ್ನು ಒಳಗಡೆಯೇ ಇರಿಸಿ ಶಾಶ್ವತವಾಗಿ ಬಾಗಿಲು ಮುಚ್ಚಲಾಗಿತ್ತು ಎಂಬ ಭೀಕರ ಕಥೆಯಿದೆ. ಅಮಾವಾಸ್ಯೆಯ ರಾತ್ರಿಗಳಲ್ಲಿ ಕುದುರೆಗಳ ಕಾಲ್ತುಳಿತ, ಕತ್ತಿಗಳ ಘರ್ಷಣೆಯ ಸದ್ದು ಕೇಳಿಸುತ್ತದೆ ಹಾಗೂ ಜಾನುವಾರುಗಳು ಬೆಚ್ಚಿಬೀಳುತ್ತವೆ ಎಂದು ಸ್ಥಳೀಯರು ನಡುಕದಿಂದಲೇ ವಿವರಿಸುತ್ತಾರೆ.

​ಕೋಟೆ ಆವರಣದಲ್ಲಿ ಈಗ ಕೃಷಿ:

ಶತಮಾನಗಳ ಭವ್ಯ ಇತಿಹಾಸ ಹೊಂದಿರುವ ಈ ಐತಿಹಾಸಿಕ ಹೆಜ್ಜೆಗುರುತು ಇಂದು ಕೃಷಿ ಭೂಮಿಯಾಗಿ ಮಾರ್ಪಟ್ಟಿದೆ.

​ಕೃಷಿ ಆಕ್ರಮಣ: ಎರಡು ಎಕರೆ ಕೋಟೆಯ ಮಣ್ಣಿನ ಗೋಡೆಗಳ ನಡುವೆಯೇ ಬಾಳೆ ಹಾಗೂ ಜೋಳ ಬೆಳೆಯಲಾಗುತ್ತಿದೆ.

​ಕುರಿ-ಮೇಕೆಗಳ ಗೂಡು: ಕೋಟೆಯ ಆವರಣವನ್ನು ಜಾನುವಾರುಗಳ ಕೊಟ್ಟಿಗೆಯನ್ನಾಗಿ ಮಾಡಿಕೊಳ್ಳಲಾಗಿದ್ದು, ಐತಿಹಾಸಿಕ ಕಾವಲು ಗೋಪುರಗಳು ಸಂಪೂರ್ಣವಾಗಿ ಕುಸಿದು ಬೀಳುವ ಹಂತ ತಲುಪಿವೆ.

​ಸಾರ್ವಜನಿಕರ ಹಾಗೂ ಗ್ರಾಮಸ್ಥರ ಆಗ್ರಹ:

ಈ ಪ್ರಾಚೀನ ಕೋಟೆಯನ್ನು ಪುನರುಜ್ಜೀವನಗೊಳಿಸಿದರೆ ಉತ್ತಮ ಪ್ರವಾಸಿ ತಾಣವಾಗಿ ಮಾರ್ಪಡಬಹುದು. ಆದ್ದರಿಂದ ತಾಲೂಕು ಆಡಳಿತ, ಪುರಾತತ್ವ ಹಾಗೂ ಪ್ರವಾಸೋದ್ಯಮ ಇಲಾಖೆಗಳು ತಕ್ಷಣ ಸ್ಥಳಕ್ಕೆ ಭೇಟಿ ನೀಡಿ, ಜಾಗವನ್ನು ಅತಿಕ್ರಮಣದಿಂದ ಮುಕ್ತಗೊಳಿಸಿ ಐತಿಹಾಸಿಕ ಸ್ಮಾರಕವನ್ನು ರಕ್ಷಿಸಬೇಕೆಂದು ಗ್ರಾಮಸ್ಥರು ಮನವಿ ಮಾಡಿದ್ದಾರೆ.