ಭಾಗಮಂಡಲ ಮೇಲ್ಸೇತುವೆ ಸುತ್ತಮುತ್ತಲ ಕಾಮಗಾರಿಗೆ ₹3 ಕೋಟಿ ಅನುದಾನ: ಶಾಸಕ ಎ.ಎಸ್. ಪೊನ್ನಣ್ಣ ಪ್ರಯತ್ನಕ್ಕೆ ಫಲ
ಭಾಗಮಂಡಲ: ದಕ್ಷಿಣ ಭಾರತದ ಪವಿತ್ರ ಜೀವನದಿ ಕಾವೇರಿಯ ಸನ್ನಿಧಿಯಾದ ಭಾಗಮಂಡಲದ ಮೇಲ್ಸೇತುವೆ ಹಾಗೂ ಅದರ ಸುತ್ತಮುತ್ತಲ ಭಾಗದ ಸಮಗ್ರ ಅಭಿವೃದ್ಧಿಗೆ ₹3 ಕೋಟಿ ಅನುದಾನ ಬಿಡುಗಡೆಯಾಗಿದೆ. ವಿರಾಜಪೇಟೆ ಕ್ಷೇತ್ರದ ಶಾಸಕ ಎ.ಎಸ್. ಪೊನ್ನಣ್ಣ ಅವರ ನಿರಂತರ ಶ್ರಮ ಹಾಗೂ ಕೋರಿಕೆಯ ಮೇರೆಗೆ ಕಾವೇರಿ ನೀರಾವರಿ ನಿಗಮವು ಈ ಅನುದಾನವನ್ನು ಮಂಜೂರು ಮಾಡಿದೆ.
ಈಗಾಗಲೇ ಯೋಜನೆಯ ಟೆಂಡರ್ ಪ್ರಕ್ರಿಯೆಗಳು ಯಶಸ್ವಿಯಾಗಿ ಪೂರ್ಣಗೊಂಡಿದ್ದು, ಕಾಮಗಾರಿಗೆ ಕಾರ್ಯಾದೇಶ (Work Order) ನೀಡಲಾಗಿದೆ ಎಂದು ಕಾವೇರಿ ನೀರಾವರಿ ನಿಗಮದ ಪ್ರಕಟಣೆ ತಿಳಿಸಿದೆ.
ಪಾದಚಾರಿ ಸೇತುವೆ ನಿರ್ಮಾಣ: ಕಾವೇರಿ ನದಿ ಹಾಗೂ ಕನ್ನಿಕೆ ನದಿಗೆ ಪ್ರತ್ಯೇಕ ಪಾದಚಾರಿ ಸೇತುವೆಗಳ ನಿರ್ಮಾಣ.
ಸೌಂದರ್ಯೀಕರಣ ಹಾಗೂ ಕಾಂಕ್ರೀಟೀಕರಣ: ಮೇಲ್ಸೇತುವೆ ಆವರಣದ ಸುಧಾರಣೆ ಮತ್ತು ಮೇಲ್ಸೇತುವೆಯ ಕೆಳಭಾಗದಲ್ಲಿ ಕಾಂಕ್ರೀಟ್ ಕಾಮಗಾರಿ.
ಚರಂಡಿ ಮತ್ತು ಪೈಪ್ಲೈನ್ ಸುಧಾರಣೆ: ನೀರು ಸುಸೂತ್ರವಾಗಿ ಹರಿದುಹೋಗಲು ಪೈಪ್ಲೈನ್ಗಳ ಸರಿಪಡಿಸುವಿಕೆ.
ಬೆಂಗಳೂರಿನ ಪ್ರಥಮ ದರ್ಜೆ ಗುತ್ತಿಗೆದಾರರಾದ ಕೆ. ರೋಹಿತ್ ಅವರು ಈ ಕಾಮಗಾರಿಯ ಗುತ್ತಿಗೆಯನ್ನು ಪಡೆದುಕೊಂಡಿದ್ದಾರೆ. 2026ರ ಅಕ್ಟೋಬರ್ ಅಂತ್ಯದೊಳಗೆ ಎಲ್ಲಾ ಕಾಮಗಾರಿಗಳನ್ನು ಪೂರ್ಣಗೊಳಿಸಿ ಸಾರ್ವಜನಿಕರ ಬಳಕೆಗೆ ಹಸ್ತಾಂತರಿಸಬೇಕು ಎಂದು ನೀರಾವರಿ ನಿಗಮವು ಸ್ಪಷ್ಟ ಆದೇಶ ನೀಡಿದೆ.
ಭಾಗಮಂಡಲ ತ್ರಿವೇಣಿ ಸಂಗಮಕ್ಕೆ ಆಗಮಿಸುವ ಲಕ್ಷಾಂತರ ಭಕ್ತಾದಿಗಳಿಗೆ ಹಾಗೂ ಪ್ರವಾಸಿಗರಿಗೆ ಈ ಮೂಲಸೌಕರ್ಯ ಅಭಿವೃದ್ಧಿ ಯೋಜನೆಯಿಂದ ಹೆಚ್ಚಿನ ಅನುಕೂಲವಾಗಲಿದೆ.
