ಶಿಡ್ಲಘಟ್ಟ: ಪವಿತ್ರ ಕರಗ ಉತ್ಸವದಲ್ಲಿ ಅಶ್ಲೀಲ ನರ್ತನ; ಭಕ್ತಿ ಭಾವದ ಕಾರ್ಯಕ್ರಮಕ್ಕೆ ‘ನಂಗನಾಚ್’ ಕಳಂಕ!
ಚಿಕ್ಕಬಳ್ಳಾಪುರ: ಜಿಲ್ಲೆಯ ಪ್ರಸಿದ್ಧ ಧಾರ್ಮಿಕ ಉತ್ಸವಗಳಲ್ಲಿ ಒಂದಾದ ಶಿಡ್ಲಘಟ್ಟದ ಕರಗಮ್ಮ ದೇವಿಯ ಉತ್ಸವವು ಈ ಬಾರಿ ಅಸಭ್ಯತೆಯ ಕಾರಣಕ್ಕಾಗಿ ಸಾರ್ವಜನಿಕರ ತೀವ್ರ ಟೀಕೆಗೆ ಗುರಿಯಾಗಿದೆ. ದೇವಿಯ ಪವಿತ್ರ ಕರಗ ಮಹೋತ್ಸವದ ಅಂಗವಾಗಿ ಆಯೋಜಿಸಲಾಗಿದ್ದ ಆರ್ಕೆಸ್ಟ್ರಾದಲ್ಲಿ ನೃತ್ಯಗಾರ್ತಿಯರ ಅಶ್ಲೀಲ ನೃತ್ಯ ಪ್ರದರ್ಶನ ಕಂಡು ಜನತೆ ಛೀಮಾರಿ ಹಾಕಿದ್ದಾರೆ.
ಶಿಡ್ಲಘಟ್ಟ ನಗರದ ಫ್ಲವರ್ ಸರ್ಕಲ್ನಲ್ಲಿ ಸಾಂಸ್ಕೃತಿಕ ಕಾರ್ಯಕ್ರಮದ ಹೆಸರಿನಲ್ಲಿ ಆರ್ಕೆಸ್ಟ್ರಾ ಹಮ್ಮಿಕೊಳ್ಳಲಾಗಿತ್ತು. ಕರಗ ಉತ್ಸವದ ಹಿನ್ನೆಲೆಯಲ್ಲಿ ಸಾವಿರಾರು ಸಂಖ್ಯೆಯಲ್ಲಿ ಮಹಿಳೆಯರು, ಮಕ್ಕಳು ಹಾಗೂ ಹಿರಿಯರು ಭಕ್ತಿಯಿಂದ ಭಾಗವಹಿಸಿದ್ದರು. ಆದರೆ, ಕಾರ್ಯಕ್ರಮ ಆರಂಭವಾಗುತ್ತಿದ್ದಂತೆಯೇ ವೇದಿಕೆಯ ಮೇಲೆ ನೃತ್ಯಗಾರ್ತಿಯರು ಸಭ್ಯತೆಯ ಗೆರೆ ದಾಟಿ ಅಶ್ಲೀಲವಾಗಿ ಕುಣಿಯಲಾರಂಭಿಸಿದರು.
ಪವಿತ್ರ ಕರಗವನ್ನು ನೋಡಲು ಕುಟುಂಬ ಸಮೇತರಾಗಿ ಬಂದಿದ್ದ ಭಕ್ತರು, ಈ ‘ನಂಗನಾಚ್’ ಕಂಡು ತೀವ್ರ ಮುಜುಗರಕ್ಕೊಳಗಾದರು. ಭಕ್ತಿ ಪ್ರಧಾನವಾದ ಉತ್ಸವದಲ್ಲಿ ಇಂತಹ ಅಸಭ್ಯ ನೃತ್ಯ ಪ್ರದರ್ಶನಕ್ಕೆ ಅವಕಾಶ ನೀಡಿದ್ದು ಎಷ್ಟು ಸರಿ ಎಂದು ಸಾರ್ವಜನಿಕರು ಆಯೋಜಕರನ್ನು ಪ್ರಶ್ನಿಸುತ್ತಿದ್ದಾರೆ.
ಸಂಪ್ರದಾಯಕ್ಕೆ ಧಕ್ಕೆ: ಕರಗಮ್ಮ ದೇವಿಯ ನೂರಾರು ವರ್ಷಗಳ ಪವಿತ್ರ ಸಂಪ್ರದಾಯಕ್ಕೆ ಈ ಅಶ್ಲೀಲ ಡ್ಯಾನ್ಸ್ ಕಳಂಕ ತಂದಿದೆ ಎಂದು ಭಕ್ತರು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.
ಆಯೋಜಕರ ಬೇಜವಾಬ್ದಾರಿ: ಸಾಂಸ್ಕೃತಿಕ ಕಾರ್ಯಕ್ರಮದ ಹೆಸರಿನಲ್ಲಿ ಇಂತಹ ಅಸಭ್ಯತೆಗೆ ವೇದಿಕೆ ಕಲ್ಪಿಸಿಕೊಟ್ಟ ಆಯೋಜಕರ ವಿರುದ್ಧ ಸಾರ್ವಜನಿಕ ವಲಯದಲ್ಲಿ ತೀವ್ರ ಖಂಡನೆ ವ್ಯಕ್ತವಾಗಿದೆ.
ಸಾರ್ವಜನಿಕರ ಆಕ್ಷೇಪ: “ಮಕ್ಕಳು ಮತ್ತು ಮಹಿಳೆಯರಿರುವ ಜಾಗದಲ್ಲಿ ಇಂತಹ ಪ್ರದರ್ಶನಗಳು ನಡೆಯುತ್ತಿರುವುದು ನಮ್ಮ ಸಂಸ್ಕೃತಿಗೆ ವಿರುದ್ಧವಾದದ್ದು” ಎಂದು ಸ್ಥಳೀಯರು ಕಿಡಿ ಕಾರಿದ್ದಾರೆ.
ಪವಿತ್ರ ಉತ್ಸವವೊಂದನ್ನು ಪ್ರಚಾರ ಅಥವಾ ಮನೋರಂಜನೆಯ ಹೆಸರಿನಲ್ಲಿ ಈ ಮಟ್ಟಕ್ಕೆ ಇಳಿಸಿದವರ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಬೇಕು ಎಂಬ ಒತ್ತಾಯ ಕೇಳಿಬಂದಿದೆ.
