ಹಿರೇಲಿಂಗದಹಳ್ಳಿ ಹೊಂಡದಲ್ಲಿ ಅಪರೂಪದ ‘ನೀರು ನಾಯಿಗಳು’ ಪ್ರತ್ಯಕ್ಷ: ಜೀವವೈವಿಧ್ಯದ ಆಗಮನಕ್ಕೆ ಗ್ರಾಮಸ್ಥರಲ್ಲಿ ಕುತೂಹಲ

ಹಾವೇರಿ: ತಾಲೂಕಿನ ಹಿರೇಲಿಂಗದಹಳ್ಳಿ ಗ್ರಾಮಕ್ಕೆ ಹೊಂದಿಕೊಂಡಿರುವ ನೈಸರ್ಗಿಕ ಹೊಂಡವೊಂದರಲ್ಲಿ ಅಪರೂಪದ ಜಲಚರ ಜೀವಿಗಳಾದ ‘ನೀರು ನಾಯಿಗಳು’ (Otters) ಪ್ರತ್ಯಕ್ಷವಾಗಿದ್ದು, ಸ್ಥಳೀಯ ಗ್ರಾಮಸ್ಥರಲ್ಲಿ ತೀವ್ರ ಕುತೂಹಲ ಮತ್ತು ಕೌತುಕವನ್ನು ಮೂಡಿಸಿದೆ.

​ಕಳೆದ ಕೆಲವು ದಿನಗಳಿಂದ ಈ ಹೊಂಡದಲ್ಲಿ ಆറಕ್ಕೂ ಹೆಚ್ಚು ನೀರು ನಾಯಿಗಳು ಹಿಂಡಾಗಿ ಚಲಿಸುತ್ತಿರುವುದು ಕಂಡುಬಂದಿದೆ. ಸಾಮಾನ್ಯವಾಗಿ ಸದಾ ಹರಿಯುವ ನದಿ, ಬೃಹತ್ ಕೆರೆಗಳ ಬಳಿ ಕಾಣಿಸಿಕೊಳ್ಳುವ ಈ ಜೀವಿಗಳು ಗ್ರಾಮದ ಹೊಂಡದಲ್ಲಿ ಪ್ರತ್ಯಕ್ಷವಾಗಿರುವುದು ವಿಶೇಷ ಗಮನ ಸೆಳೆದಿದೆ.

​ಜಲ ಪರಿಸರದ ಆರೋಗ್ಯ ಮತ್ತು ಜೀವವೈವಿಧ್ಯಕ್ಕೆ ಸಾಕ್ಷಿ:

ನೀರು ನಾಯಿಗಳು ಜಲ ಪರಿಸರ ವ್ಯವಸ್ಥೆಯ ಆಹಾರ ಸರಪಳಿಯಲ್ಲಿ ಪ್ರಮುಖ ಪಾತ್ರ ವಹಿಸುತ್ತವೆ. ಮೀನು, ಕಪ್ಪೆ ಹಾಗೂ ಸಣ್ಣ ಜಲಚರಗಳನ್ನು ಆಹಾರವಾಗಿ ಸೇವಿಸುವ ಇವುಗಳ ಉಪಸ್ಥಿತಿಯು, ಹೊಂಡದಲ್ಲಿ ಜೀವವೈವಿಧ್ಯತೆ ಹಾಗೂ ನೀರಿನ ಶುದ್ಧತೆ ಉತ್ತಮವಾಗಿದೆ ಎಂಬುದರ ಸಂಕೇತವಾಗಿದೆ.

​ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯಡಿ ಅಭಿವೃದ್ಧಿ:

ಇತ್ತೀಚೆಗಷ್ಟೇ ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆಯಡಿ ಈ ಹೊಂಡವನ್ನು ಅಭಿವೃದ್ಧಿಪಡಿಸಿ, ಜಲಮೂಲವನ್ನು ಪುನಶ್ಚೇತನಗೊಳಿಸಲಾಗಿತ್ತು. ಹೊಂಡದ ಸ್ವಚ್ಛತೆಯ ಬೆನ್ನಲ್ಲೇ ಈ ಅಪರೂಪದ ಜಲಚರಗಳು ವಾಸಸ್ಥಾನ ಕಂಡುಕೊಂಡಿರುವುದು, ಜಲಮೂಲ ಸಂರಕ್ಷಣೆಯ ಸಫಲತೆಗೆ ಸ್ಪಷ್ಟ ಉದಾಹರಣೆಯಾಗಿದೆ.

​ಸಂರಕ್ಷಣೆಗೆ ಗ್ರಾಮಸ್ಥರ ಸಹಕಾರ ಅಗತ್ಯ:

ಹೊಂಡದಲ್ಲಿ ಆಶ್ರಯ ಪಡೆದಿರುವ ಈ ನೀರು ನಾಯಿಗಳಿಗೆ ಯಾವುದೇ ರೀತಿಯ ಹಾನಿ ಉಂಟಾಗದಂತೆ ಗ್ರಾಮಸ್ಥರು ಜಾಗೃತಿ ವಹಿಸಬೇಕಿದೆ. ಅವುಗಳನ್ನು ಬೆನ್ನಟ್ಟುವುದು, ಹಿಡಿಯಲು ಯತ್ನಿಸುವುದು ಅಥವಾ ಕಿರುಕುಳ ನೀಡುವುದನ್ನು ತಡೆದು, ನೈಸರ್ಗಿಕ ವಾತಾವರಣದಲ್ಲೇ ಸ್ವತಂತ್ರವಾಗಿ ಸಂಚರಿಸಲು ಅವಕಾಶ ಮಾಡಿಕೊಡಬೇಕಿದೆ.

​”ಹೊಂಡದ ಸ್ವಚ್ಛತೆ ಹಾಗೂ ಸುತ್ತಲಿನ ನೈಸರ್ಗಿಕ ಪರಿಸರವನ್ನು ಸಂರಕ್ಷಿಸುವುದರಿಂದ ಮುಂದಿನ ದಿನಗಳಲ್ಲಿಯೂ ಇಂತಹ ಅಪರೂಪದ ಜಲಚರ ಜೀವಿಗಳು ಉಳಿದುಕೊಳ್ಳಲು ಸಹಕಾರಿಯಾಗಲಿದೆ.”