ಬೆಂಗಳೂರು: ಸಾಧಕ ಮಹಿಳೆಯರಿಗೆ ‘ದಿಟ್ಟ ಮಹಿಳಾ ಪ್ರಶಸ್ತಿ’ ಗೌರವ ಸಮರ್ಪಣೆ :ಪ್ರಶಸ್ತಿ ಪಡೆದ ಬೆಂಗಳೂರು ಸಿಟಿ ಎಸಿಪಿ ಡಾ.ಪ್ರಿಯದರ್ಶಿನಿ ಈಶ್ವರ್ ಸಾಣಿಕೊಪ್ಪ

ಬೆಂಗಳೂರು: ವಿಶ್ವ ಮಹಿಳಾ ದಿನಾಚರಣೆಯ ಸುಸಂದರ್ಭದಲ್ಲಿ, ವಿವಿಧ ಕ್ಷೇತ್ರಗಳಲ್ಲಿ ಅಭೂತಪೂರ್ವ ಸಾಧನೆ ಮಾಡಿದ ಮಹಿಳೆಯರನ್ನು ಗುರುತಿಸಿ ಸನ್ಮಾನಿಸುವ ಸಲುವಾಗಿ ಬೆಂಗಳೂರಿನ ಡಾ|| ರಾಜ್ ಕುಮಾರ್ ಗಾಜಿನಮನೆ ಆವರಣದಲ್ಲಿ ‘ದಿಟ್ಟ ಮಹಿಳಾ ಪ್ರಶಸ್ತಿ’ ಪ್ರದಾನ ಸಮಾರಂಭವು ಅತ್ಯಂತ ಅದ್ಧೂರಿಯಾಗಿ ಜರುಗಿತು.

​ಜಿಬಿಎ-ಪಾಲಿಕೆಗಳ ಅಧಿಕಾರಿ ಮತ್ತು ನೌಕರರ ಕ್ಷೇಮಾಭಿವೃದ್ಧಿ ಸಂಘದ ವತಿಯಿಂದ ಆಯೋಜಿಸಲಾಗಿದ್ದ ಈ ಕಾರ್ಯಕ್ರಮವು ಸಮಾಜದ ವಿವಿಧ ಸ್ತರಗಳಲ್ಲಿ ಕೆಲಸ ಮಾಡುವ ಮಹಿಳಾ ಶಕ್ತಿಯನ್ನು ಸಂಭ್ರಮಿಸುವ ವೇದಿಕೆಯಾಯಿತು.

ಗಣ್ಯರ ಉಪಸ್ಥಿತಿ: ಬಿಬಿಎಂಪಿ ಮುಖ್ಯ ಆಯುಕ್ತರಾದ ಮಹೇಶ್ವರ ರಾವ್, ರಾಜ್ಯ ಸರ್ಕಾರಿ ನೌಕರರ ಸಂಘದ ಅಧ್ಯಕ್ಷರಾದ ಷಡಕ್ಷರಿ, ಮತ್ತು ಸಚಿವಾಲಯ ನೌಕರರ ಸಂಘದ ಅಧ್ಯಕ್ಷರಾದ ರಮೇಶ ಸಂಗಾ ಅವರು ಕಾರ್ಯಕ್ರಮದಲ್ಲಿ ಭಾಗವಹಿಸಿ ಚಾಲನೆ ನೀಡಿದರು.

​ಸಿನಿಮಾ ತಾರೆಯರ ಮೆರುಗು: ಹಿರಿಯ ನಟಿಯರಾದ ಜಯಪ್ರದ, ಮಹಾಲಕ್ಷ್ಮಿ, ಊರ್ವಶಿ, ವಿನಯ ಪ್ರಸಾದ್ ಮತ್ತು ಪ್ರಮೀಳ ಜೋಷಯ್ ಅವರು ಪಾಲ್ಗೊಂಡು ಕಾರ್ಯಕ್ರಮಕ್ಕೆ ಕಳೆ ನೀಡಿದರು.

​ಸಂಘಟನೆಯ ಸಾರಥ್ಯ: ಜಿಬಿಎ-ಪಾಲಿಕೆಗಳ ಅಧಿಕಾರಿ ಮತ್ತು ನೌಕರರ ಕ್ಷೇಮಾಭಿವೃದ್ಧಿ ಸಂಘದ ಅಧ್ಯಕ್ಷರಾದ ಎ. ಅಮೃತ್ ರಾಜ್ ಅವರ ನೇತೃತ್ವದಲ್ಲಿ ಇಡೀ ಕಾರ್ಯಕ್ರಮ ಯಶಸ್ವಿಯಾಗಿ ನಡೆಯಿತು.

​ಸಿನಿಮಾ, ವೈದ್ಯಕೀಯ, ಸಮಾಜ ಸೇವೆ ಹಾಗೂ ಆಡಳಿತ ಕ್ಷೇತ್ರಗಳಲ್ಲಿ ಗಣನೀಯ ಸೇವೆ ಸಲ್ಲಿಸಿದ ಗಣ್ಯರನ್ನು ಈ ಸಂದರ್ಭದಲ್ಲಿ ‘ದಿಟ್ಟ ಮಹಿಳಾ ಪ್ರಶಸ್ತಿ’ ನೀಡಿ ಪುರಸ್ಕರಿಸಲಾಯಿತು.

ಭಾರತೀಯ ಚಿತ್ರರಂಗದ ದಂತಕಥೆಗಳಾದ ಜಯಪ್ರದ, ಮಹಾಲಕ್ಷ್ಮಿ, ಊರ್ವಶಿ, ವಿನಯಪ್ರಸಾದ್ ಮತ್ತು ಪ್ರಮೀಳ ಜೋಷಯ್ ಅವರ ಉಪಸ್ಥಿತಿಯು ಕಾರ್ಯಕ್ರಮಕ್ಕೆ ವಿಶೇಷ ಕಳೆ ನೀಡಿತು. ದಶಕಗಳ ಕಾಲ ಬೆಳ್ಳಿತೆರೆಯ ಮೇಲೆ ಮಿಂಚಿದ ಈ ಸಾಧಕಿಯರು ಪ್ರಶಸ್ತಿ ಪಡೆಯುವ ಮೂಲಕ ಇಂದಿನ ಪೀಳಿಗೆಯ ಮಹಿಳೆಯರಿಗೆ ಸ್ಫೂರ್ತಿಯಾದರು.

ಈ ಸಮಾರಂಭದ ವಿಶೇಷತೆಯೆಂದರೆ ಪ್ರಶಸ್ತಿಯನ್ನು ಕೇವಲ ಒಂದು ಕ್ಷೇತ್ರಕ್ಕೆ ಸೀಮಿತಗೊಳಿಸದೆ, ಡಾ. ಇಂದಿರಾ ಕಬಾಡೆ, ಡಾ. ಪ್ರಿಯದರ್ಶಿನಿ ಈಶ್ವರ್ ಸಾಣಿಕೊಪ್ಪ ( ಬೆಂಗಳೂರು ಸಿಟಿ ಕಬ್ಬನ್ ಪಾರ್ಕ್ಡಿವಿಷನ್ ಎಸಿಪಿ ), ಸಂಗೀತ (ಮಂಜುಳ ಗುರುರಾಜ್), ಸಮಾಜ ಸೇವೆ ಮತ್ತು ಪಾಲಿಕೆಯ ವಿವಿಧ ಹಂತಗಳಲ್ಲಿ ಶ್ರಮಿಸುತ್ತಿರುವ ಮಹಿಳೆಯರಿಗೆ ನೀಡಲಾಯಿತು. ಸುಮಾರು 30ಕ್ಕೂ ಹೆಚ್ಚು ಸಾಧಕಿಯರನ್ನು ‘ದಿಟ್ಟ ಮಹಿಳಾ ಪ್ರಶಸ್ತಿ’ ನೀಡಿ ಸನ್ಮಾನಿಸಲಾಯಿತು.

“ಸಾಧನೆಗೆ ಲಿಂಗಭೇದವಿಲ್ಲ”. ಸಿನಿಮಾ ರಂಗದ ಗ್ಲಾಮರ್‌ನಿಂದ ಹಿಡಿದು, ಆಸ್ಪತ್ರೆಯ ತುರ್ತು ಚಿಕಿತ್ಸಾ ಘಟಕದವರೆಗೆ ಮತ್ತು ಕಚೇರಿಗಳ ಆಡಳಿತದವರೆಗೆ ಮಹಿಳೆಯರು ತೋರುತ್ತಿರುವ ‘ದಿಟ್ಟ’ತನವೇ ಈ ಪ್ರಶಸ್ತಿಯ ನಿಜವಾದ ಗೌರವ.

ಮಹಿಳೆಯರು ಕೇವಲ ಒಂದು ಕ್ಷೇತ್ರಕ್ಕೆ ಸೀಮಿತವಾಗದೆ, ಎಲ್ಲಾ ರಂಗಗಳಲ್ಲೂ ತಮ್ಮ ಛಾಪು ಮೂಡಿಸುತ್ತಿದ್ದಾರೆ. ಅಂತಹ ದಿಟ್ಟ ಮಹಿಳೆಯರನ್ನು ಗೌರವಿಸುವುದು ಇಡೀ ಸಮಾಜಕ್ಕೆ ಹೆಮ್ಮೆಯ ವಿಷಯ,” ಎಂದು ಕಾರ್ಯಕ್ರಮದಲ್ಲಿ ಗಣ್ಯರು ಅಭಿಪ್ರಾಯಪಟ್ಟರು.

ವರದಿ :- ಆಂಟೋನಿ ಪತ್ರಕರ್ತ